नेपाली हास्यव्यङ्ग्य अनलाइन पत्रिका

केपी पौडेल जस्ताघरे :

सुगा मैना डाँफे खुब विरहमा छन् कठिनमा ।
रुँदै भाका फेर्छन् युवक नहुँदा यो मुलुकमा ॥
मुसो,गैँडा, हात्ती पनि पिर गरी मूर्च्छिछत भए ।
व्यथा कुण्ठा बोक्दै युवक युवती बाहिर गए ॥-१

जुका, ब्वाँसा, राँगा, चिल, कुकुरका बैठक भए ।
कठै गौरीगाई, हरिण, मृगका घाँस सकिए ॥
यसो हेर्दा बुझ्दा भव सकलका गाँस लुटिए ।
अहो! पीडा बोक्दै युवक युवती बाहिर गए ॥ -२

नदी झर्ना खोला अनि विटपमा रोदन बढ्यो ।
गरा, पाखा, कान्ला, धुर, जमिनका शोभन गुम्यो ॥
यहाँ मान्छे हाम्रा कलुषित भई नायक भए ।
दशा चिन्ता बोक्दै युवक युवती बाहिर गए ॥ -३

तराई, बेँसीमा, हिमशिखरमा धड्कन बढ्यो ।
पहाडी डाँडाका,वन,विपिनका गौरव घट्यो ॥
बिसौनी, चौतारो सकल वटुवा न्यास्रिन पुगे ।
कुना, पाखा छोडी युवक युवती बाहिर गए ॥ -४

मिठो ठाडो भाका,भजन रसका बालन थिए ।
सुसेली,द्यौडाका मधुर लयका गुञ्जन थिए ॥
विदेशी मान्छेका विधि चलनका नक्कल भए ।
कला आफ्ना छोडी युवक युवती बाहिर गए ॥ -५

मकै,रोटी मोई अझ असल हुन् गुन्द्रुक ढिँडो ।
मिलाई खाँदामा अपच नहुने फापर मिठो ॥
मुला,बन्दा ,रायो खुब रस दिने काफल थिए ।
सबै छोडी हाम्रा युवक युवती बाहिर गए ॥ -६

०००
बट्टार, नुवाकोट । हालः बालाजु, काठमाडौं ।
मोबाइल नं. ९८४१७५८१८४