नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

निषेधको रानजीति सुकेलुतो बनी
आलोपालो लाजनीति भएको छ धनी ।
भुटानी र लुटानीमा लुतो लागेको छ
त्यै लुताले सताएर युवा भागेको छ ॥

सङ्घीयता बनेको छ हलोकाटी मुङ्ग्रो
लुते मुङ्ग्रो सल्किएर भएको भुङ्ग्रो ।
जताततै फैलिएको लुतो भ्रष्टाचारी
सुकेलुतो चुलिएर भएको छ भारी ॥

भुङ्ग्रो बनी डसेको छ खसेको छ अर्थ
सुकेलुतो कन्याउँदा अर्थ भयो व्यर्थ ।
बालकाण्ड, गिरीबन्धु, काण्ड सहकारी
अनगिन्ती काण्ड गर्ने गणतन्त्रधारी ॥

नाइके र टाउके बसे लुतो कन्याएर
देश नाङ्गो पारिकसे नोट खन्याएर ।
लुतो सर्न थालेको छ दायाँ-बायाँ गरी
सल्किएर फैलेको छ सारा अङ्गभरि ॥

फाल्नुपर्छ लुतोलाई अगुल्टाले हानी
विकृति र विसङ्गति रोग ठूलो ठानी ।
उपचार गर्नुपर्छ परिष्कार गरी
लुतो यदि रह्यो भने गर्छ मनपरी ॥

सुकेलुतो सल्किएर देश सुकेको छ
लुतोपोतो पल्किएर देशै लुटेको छ ।
लुटाहा र फटाहाले लुतो पालेका छन्
लुतोलाई लुकाउन लुताे लागेका छन् ॥

नेताजीको राष्ट्रिय पहिरन ।
सुकेलुतो कन्याउँदा हैरान ॥

०००
नागार्जुन न.पा.-१, रानीवन, काठमाडौँ
९८४१४९१०८१