नेपाली हास्यव्यङ्ग्य अनलाइन पत्रिका

उत्तम विचार :

विनाश नाशमा झर्‍यो विकास उर्लिएसरि
स्वराष्ट्र स्वर्गझैँ थियो हुँदै छ भन्दछे चरी ।
भनेन भ्रष्टले अझैँ घिचेर पेटमैँ भरूँ
रहेछु मस्त स्वप्नमा उठेन राष्ट्र के गरूँ ।१।

चढेर रेल दौडिएँ पुगेँ म पूर्व पश्चिम
जहाज चढ्न तम्सिएँ नदी सवार तालमा ।
पुगी विराट चोकमा म ठान्दथेँ त्यहीँ झरूँ
रहेछु स्वप्नमा स्वयम् उठेन राष्ट्र के गरूँ ।२।

भुलेर स्वार्थका घडा विकास गर्न तम्सिएँ
तुरुन्त लक्ष्यमा पुगौँ भनेर शीघ्र लम्किएँ ।
न भ्रष्ट भेटियो कतै भन्यो न भाग मैँ हरूँ
रहेछु स्वप्नमा हरे उठेन राष्ट्र के गरूँ ।३।

युरोप ठान्दथेँ अहो ! भयो यही अमेरिका
गरेर तुलना भने समस्त लाग्दछन् फिका ।
विदेशमा हुने यतै विचार गर्दथे फिरूँ
रहेछु स्वप्नमा अझै उठेन राष्ट्र के गरूँ ।४।

नदी मुहान ताल छन् सफा अत्यन्त सुग्घर
गरेर गर्व ठान्दथेँ स्वदेश विश्वको घर ।
डुलेर इन्द्र देवता भने म स्वर्गमा सरूँ
रहेछु स्वप्नमा अहो उठेन राष्ट्र के गरूँ ।५।

०००
काठमाडौं