नेपाली हास्यव्यङ्ग्य अनलाइन पत्रिका

उत्तम विचार :

जान्दिनन् कामको मेसो गर्दिनन् या त श्रीमती
देखेर उनको चाला वाक्कदिक्क भए पति ।
गल्ती गरेर बम्किन्छिन् असाध्य लाग्दछिन् हकी
जान्नेसुन्ने अरूभन्दा श्रीमती मध्य वर्गकी ।।१।

महँगा रोज्दछिन् साडी खल्तीमा नहुँदा सुको
खर्चको फाँटमा पुग्दा पतिको दुख्छ टाउको ।
कहिले बन्दछिन् ज्ञानी कहिले त अबुज्झकी
तथापि घरकी आशा श्रीमती मध्य वर्गकी ।।२।

श्रीमान् असल अर्काको देख्ने नजर वैगुनी
कमाउने उही ज्यादा आफ्नो त्यस्तै भए हुने ।
कुतर्क मनमा खेल्छन् धनी असाध्य तर्ककी
खोजे सर्वत्र भेटिन्छिन् श्रीमती मध्य वर्गकी ।।३।

न उच्च वर्गमा पर्छिन् न अट्छिन् निम्न वर्गमा
स्वतन्त्र शब्दझैँ ठान्छिन् गनिन्छिन् परसर्गमा ।
यताको हाल जस्तोछ त्यता अलग पो छ कि
भन्नुहोस् कसरी बाँंच्छिन् श्रीमती मध्य वर्गकी ।।४।

अभाव भावले टारून् अनिकाल भए पनि
साथमा पति होऊन् या विदेश गए पनि ।
उनै लाग्छिन् महाकाव्य एघार माथि सर्गकी
सकिन्नझैँ पढी लाग्छिन् श्रीमती मध्य वर्गकी ।।५।

०००
काठमाडाैं