नेपाली हास्यव्यङ्ग्य अनलाइन पत्रिका

उत्तम विचार :

भोकै मर्दैन नेपाली खान्छ ऊ कर्मको फल
आलस्यमा हुँदै हैन झिक्छ जाँगरिलो बल ।
मास्न जान्दैन अर्काको बस्ने घर बनाउँछ
दासी होइन नेपाली कर्मयोगी भनाउँछ ।।१।

थुप्रै सम्भावनाका छन् चाङ यो देशमा तर
जान बाध्य भए आज छोडेर देश बाहिर ।
राष्ट्रको प्रेम जागेर फर्केर घर आउँछ
दासी होइन नेपाली कर्मयोगी भनाउँछ ।।२।

पैसामा बेचिने वस्तु किन्तु होइन मानव
दलाली नित्य चल्दै छ भोज भतेर उत्सव ।
छ व्यस्त गन्नमै राज्य जो विप्रेषण पाउँछ
दासी होइन नेपाली कर्मयोगी भनाउँछ ।।३।

आर्जेको वीर पुर्खाले पढ्छ ऊ इतिहासमा
राष्ट्र निर्माणको भोक लिई तड्पिन्छ प्यासमा ।
सन्तान वीरको भन्छ वीरकै गान गाउँछ
दासी होइन नेपाली कर्मयोगी भनाउँछ ।।४।

कहाँ भेटिन्न नेपाली खोज विश्व बजारमा
शान्ति सद्भावना फुल्ने फूलका दिव्य हारमा ।
ऊ यत्रतत्र सर्वत्र संसारभर छाउँछ
दासी होइन नेपाली कर्मयोगी भनाउँछ ।।५।

०००
काठमाडाैं