नेपाली हास्यव्यङ्ग्य अनलाइन पत्रिका

उत्तम विचार :

चुपचाप तिमी चुपचापछु म
र कुरा नगरीकन बस्दछु म ।
चुपचाप समाज हुनेछ घर
चुप गाउँ रहुन् चुप हुन् सहर ।।१।

नगरेर कुरा यदि काम भए
किन फ्याँक्नु गरेर कुरा समय ।
अघि बढ्दछ फाइल टेबुलमा
सब शान्त बसून् नबसी हुलमा ।।२।

छ नदी चुपचाप किनार मौन
परिवर्तन गर्दछ धार मौन ।
छ बतास उसै चुपचाप भने
किन मानिस हुन् जहिल्यै गफिने ।।३।

चुप हुन् रसना चुपचाप मुख
छ भने चुप आदत मिल्छ सुख ।
कति घातक हुन्छ भुली बबुरो
अब डाँक ठुलो नगरोस् कुखुरो ।।४।

जब शान्त प्रशान्तछ सागर त्यो
उति शान्त उँचो जति अम्बर त्यो ।
चुपचाप घना बनजङ्गल छन्
चुपचाप हुने शुभमङ्गल हुन् ।।५।

०००
काठमाडाैं