नेपाली हास्यव्यङ्ग्य अनलाइन पत्रिका

उत्तम विचार :

पोहोर लुतो फ्याँकिनँ मैले फ्याँकिन परार
आनन्द लिई बसेको थिएँ मजाले कन्या र ।
लुतोले डस्यो शरीर मेरो लुतोले गलायो
भन्दछिन् आमा यो लुतोप्रति वितृष्णा पलायो ।।१।

हुन् भ्रष्ट जाली मुलुक खाने पापिष्ठ लुतेरा
सुगन्ध छर्ने माहुरी हैनन् हुन् गन्धे पतेरा ।
अड्किन्छ गला पार्नेछ थला लुतेराले ङ्याँके
फैलिन्छ लुतो यो देशभरी यो लुतो नफ्याँके ।।२।

कन्यायो जति मजाछ उति भनेर नबस
यो पापी लुतो नफ्याँकी हुन्न चलाऊ बहस ।
उठन दाजु उठन भाई लुतोका विरुद्ध
उठन युवा नगरी ढिलो छेड्नुछ यो युद्ध ।।३।

हजार दाउ हजार पाउ छन् भ्रष्ट लुतोका
वर्तमानमा नै लुटेर खायो भविष्य भूतोका ।
अगुल्टा बाल जोडले फाल सिमाना नघाऊ
यो राष्ट्र लुतो हुनेछ मुक्त निसाना लगाऊ ।।४।

पुरानो लुतो शरीरभरी फैलियो देशमा
लुतो नै लुतोछ सल्किएको भाषा र भेषमा ।
नपाल लुतो र फाल लुतो के काम पालेर
रहित लुतो बनाऔँ देश यही नै धन हो
लिएर स्वस्थ शरीर बाचौँ नेपाली जन हो ।।

०००
काठमाडाैं