नेपाली हास्यव्यङ्ग्य अनलाइन पत्रिका

उत्तम विचार :

मुहान सृष्टिकी मुमा नदी बनेर कल्कल
समुद्र भेट्न पुग्दछिन् बगी पवित्र निर्मल ।
रमा, उमा र पार्वती शिखा, सुयोग्य सिर्जना
समस्त मातृशक्तिमा हजार लाख वन्दना ।।१।

पिएर कष्टका घडा दुरुस्त चुस्तछिन् मुमा
सहेर भोक प्यासमा सदा दुरुस्तछिन् मुमा ।
मुमा भुलेर जिन्दगी जिऔँ गरिन्न कल्पना
समस्त मातृशक्तिमा हजार लाख वन्दना ।।२।

रुँदा चसक्क दुख्दछिन् र हाँस्दछिन् खुसी हुँदा
भरिन्छ हर्षले घडा मुमा मसक्क मस्किँदा ।
सदा खुसी रहून् सबै मुमा यही छ कामना
समस्त मातृशक्तिमा हजार लाख वन्दना ।।३।

सकिन्न तिर्न दुग्धको तिरूँ म भार के गरी
जितोस् सदैव भन्दछिन् खपूँ म हार के गरी ।
शशी शुभा र श्यामला सुशोभिता र साधना
समस्त मातृशक्तिमा हजार लाख वन्दना ।।४।

न दर्द देख्न सक्दछिन् न घाउ प्रेय होस् कुनै
सुनेर हाल मृत्युको कदापि श्रेय होस् कुनै ।
पुकार यो गरेँ मुमा ममा मिलोस् सदा क्षमा
समस्त मातृशक्तिमा हजार लाख वन्दना ।।५।

०००
काठमाडाैं