नेपाली हास्यव्यङ्ग्य अनलाइन पत्रिका

उत्तम विचार :

सुखको भोकमा मान्छे पसे सहरिया बनी
सुनसान भए बस्ती गाउँ नैं रित्तिए अनि ।।१।

देखिए सपना थुप्रै गाउँले भन्दछन् तर
विकास गाउँमा पुग्दा शून्यछन् गाउँका घर ।।२।

उल्टो विकासको नीति लागू हुँदै छ देशमा
घनत्व जनसंख्याको बढ्न थाल्यो मधेसमा ।।३।

कतै तुइनको त्रास कतै पुल जताततै
बनाई पुल खोजिन्छ नदीनाला यहाँ कतै ।।४।

कतै बजेट थुप्रिन्छ कतै छन् जन आसमा
जोडिएला भनी धारो पानीको व्यग्र प्यासमा ५।

शक्तिको भक्तिमा लागी प्रभुकै गान गाउने
बन्दै छ आजको मान्छे आशक्तिमै हराउने ।।६।

पसेको गाउँ छोडेर हिजो सहरिया हुन
अनेक दाउ खोज्दै छ यथाशीघ्र बिदेसिन ।।७।

सबैले राष्ट्र सम्झेर थालौँ कर्म यथोचित
आजको परिपाटीले रित्तिन्छ देश निश्चित ।।८।

गिर्दोछ देशको सान साख गिर्दो उसैगरी
घडा सुन्दर बन्ला र फोहोर जलले भरी ।।९।

योगदान ठुलासाना दिलोज्यानले गरूँ
छातीमा हात राखेर म नेपाल भनी मरूँ ।।१०।

०००
काठमाडाैं