नेपाली हास्यव्यङ्ग्य अनलाइन पत्रिका

उत्तम विचार :

कतै छैन क्या शान्ति भन्छन् सबैले
गरेँ हार स्वीकार लौ आज मैंले ।
छु आक्रान्त आफैँ अहिंसा घटेर
म मुर्दा भएको तिमी आज हेर ।।१।

उडेनन् परेवा उडे टन्न बाज
डर्‍यो राष्ट्र मेरो छ डर्दै समाज ।
उज्यालो कतै छैन ढाक्यो अँधेर
म मुर्दा भएँ आज छामेर हेर ।।२।

बढेकोछ मान्छेहरूमा वितृष्णा
कहाँ शान्ति पाऊन् जपी रामकृष्ण ।
महान् बुद्धवाणी गरून् के पढेर
भयो शान्ति मुर्दा तिमी आज हेर ।।३।

कुनै छैन चिन्ता मरेकोछ शान्ति
चरीझैँ थुनामा परेकोछ शान्ति ।
भनेनन् कसैले बचाऊँ भनेर
म मुर्दा त्यसैले भएँ आज हेर ।।४।

सधैँ फुल्छ फक्रिन्छ भन्थेँ म शान्ति
भयो आज संसारमा यो अशान्ति ।
गरूँ के यहाँ व्यर्थ भन्ने बुझेर
हुँ मुर्दा भएको तिमी आज हेर ।।५।

छ मेरै उपेक्षा गरी बाँच्छ मान्छे
मर्‍यो शान्ति भन्दा सुनी हाँस्छ मान्छे ।
निमोठेर घाँटी भन्यौ सास फेर
त्यसैले म मुर्दा भएँ आज हेर ।।६।

सबै बाँच्न पाऊन् अपेक्षा हरायो
छ कालो निशातुल्य सर्वत्र छायो
म आशाहरूमा निराशा भरेर
छु मुर्दा भएको तिमी आज हेर ।।७।

०००
काठमाडाैं