नेपाली हास्यव्यङ्ग्य अनलाइन पत्रिका

हरिप्रसाद रिमाल :

माता पाँच समान जीवन दिने हुन् सत्य हो आँकडा
पाएका सुख-शान्तिका महलमा त्यो प्रेमले छौँ खडा
जन्माइन् शुभ-कर्म पालन गरी धाई भइन् हुन् धनी
माता ती पतिकी मुमा सरह नै हुन् कर्मदाता पनि।।१

जन्माइन् अझ प्रेम खात मुजुरा हुर्काउँदा वेदना
आमा हुन् दिलकर्णधार मनकी बुझ्ने सबै चाहना
चिन्छौँ विश्वसमाज नित्य झरनाझैँ स्वच्छ सौदामिनी
माता ती पतिकी मुमा सरह नै हुन् कर्मदाता पनि।२

हुर्किन्छौँ सब स्नेहले कमलिनी जस्तै खुला तालमा
मौका जीवनको दियौ र पतिको पाएँ छहारी मुमा
तिम्रो स्नेह अगाध लाग्छ ममता खानी छ यो आँगनी
माता हौ पतिकी मुमा सरह नै हौ कर्मदाता पनि।।३

माता पाँच सबै समान दिलका ठानी गरे आदर
बन्ला जीवन सारथीसँग मिठो आह्लाद शोभा घर
निन्दा वा छल छाम छैन दिलमा हौ आँत-कादम्बिनी
माता हौ पतिकी मुमा सरह नै हौ कर्मदाता पनि।।४

नारी जीवन जन्म कर्म घरको संयोग राम्रो हुँदा
देखिन्छन् कलिका नयाँ र सुकिला वात्सल्य मौलाउँदा
सेवाले सुख मिल्छ मानक कला देखिन्छ यो जीवनी
माता हौ पतिकी मुमा सरह नै हौ कर्मदाता पनि।।५

०००