नेपाली हास्यव्यङ्ग्य अनलाइन पत्रिका

हरिप्रसाद रिमाल

कवित्वले खार्छ विचारधारा
दाह्री मुसारे पछि लाग्छ नारा
विचारले खार्दछ काव्यलाई
चाहिन्न दाह्री कवि बन्नलाई।।१

बाङ्गो बनाए पछि राग बढ्छ
आफ्नो कला कौशल नित्य घट्छ
र दम्भले मास्छ विवेकलाई
चाहिन्न दाह्री कवि बन्नलाई।।२

वासन्तिका कञ्चनवाग भित्र
लता अनेकौँ शुभ पुष्पचित्र
त्यस्तै भएमा कवि बन्छ धाई
चाहिन्न दाह्री कवि बन्नलाई।।३

दाह्री जुँगा सान कठोरता हो
कवित्व नौनी मह झैँ मिठो हो
शालीनता हुन्न गरे बिदाइ
चाहिन्न दाह्री कवि बन्नलाई।।४

प्रभात हो काव्य-कला सबैको
पेवा कहाँ हुन्छ र यो कसैको
विवेकले खार्दछ काव्यलाई
चाहिन्न दाह्री कवि बन्नलाई।।५

०००
झापा