नेपाली हास्यव्यङ्ग्य अनलाइन पत्रिका

हरिप्रसाद रिमाल :

विगतमा जति गर्न समर्थ थ्यौँ
अब कहाँ त्यसतर्फ फिरी कुदौँ
अब त राम सुधा-रस जान्नु छ
बलबुता सकियो न त हाँक्नु छ।।१

सफल हौँ अब वृद्ध पिओैँ सुधा
विफल पार्दछ चित्त सधैँ क्षुधा
कस बनेर क्षुधा मनमा क्षति
शरण ईश परे अब उन्नति।।२

मन-क्षुधा पर सार्छ पखाल्दछ
विनयले नय देख्छ उकास्दछ
अतिथि ठान्छ सबै मन कञ्चन
विषय राग पखाल्छ न यो धन।।३

डर र त्रास सधैँ धनमा भयो
मन पवित्र भएन क्षुधा बह्यो
विमल चिन्तन भाँच्न गयो जुनी
सफल हौँ सब वृद्ध न हौँ खुनी ।।४

मन फराक बनाउन प्रेरणा
असल सन्तति हुन् जन-कामना
सब सचेत भई झुपडीमुनि
सफल हौँ अब वृद्ध बनी मुनि।।५

०००
झापा