नेपाली हास्यव्यङ्ग्य अनलाइन पत्रिका

घनश्याम रेग्मी :

१ ) फुइँ
मैले आकाश थामेर दुनियाँ बाँच्न पाउँछ
हुटिट्याउँ यही फुर्ती दैनिकै हेर लाउँछ ।
मैले नै घाम डाकेर आएको दिन हो भनी
भालेले लाउँछन् फुर्ती आफ्नो नै नाम गाउँछ ।।

२) योग्यता
नेताजीको छ सोचाइ आफू योग्य सभापति
आफूमात्रै छु निर्दोषी बाँकी हुन् खल बापती ।
अरूको काम नै छैन के राम्रो तिनले गरे
हर्ताकर्ता सबै आफू सृष्टिको कमलापति ।।

३) वास्तविकता
गाली पुराणका ज्ञाता सर्वज्ञानी सुपण्डित
रामले माथ खानेछन् होलान् कि कृष्ण दण्डित ।
जम्मै कौरवका चाल एकैमा छ सुहाउँदो
यिनका नीतिमा चल्दा धर्ती यो रक्तरञ्जित ।।

४) अबको बाटो
पेट तालु दुखे दिल्ली दौडेर पाउमा पर
देशको अस्मिता जम्मै बेचेका किन हो तर ।
सजेको गोरुले जस्तै ओगट्छौ देश यो किन
आँटिला छन् निकै साँढे चाँडो निर्णय लौ गर ।

०००
विकास चोक ५-, चितवन