नेपाली हास्यव्यङ्ग्य अनलाइन पत्रिका

उत्तम विचार :

बढेकोछ ठन्डी धरामा असाध्य
खपी बाँच्न हामी भयौँ आज बाध्य ।
रुघा लाग्छ खोकी व्यथा छन् अनेक
कहाँ जान्छ जाडो हटी माघ एक ।।१।

गयो साल पोहोर पोखी दुखेसो
पस्यो शीत हावा मिलाएर मेसो ।
कसैले भनेनन् थुनौँ मार्ग छेक
कहाँ जान्छ जाडो हटी माघ एक ।।२।

लुगा पातला छन् भयो देह खाली
थिए जो पुराना भयौँ ढुक्क फाली ।
लुकी घाम भाग्छन् विनाताप सेक
कहाँ जान्छ जाडो हटी माघ एक ।।३।

भनी भोलिलाई नगर्ने म जोहो
खपी कष्ट बाँच्ने कि एक्लो म पो हो ।
भनी हेर्छु आँखा डुलाई छिमेक
कहाँ जान्छ जाडो हटी माघ एक ।।४।

वयोवृद्ध आमाबुबा कष्टमा छन्
हिजोआज वा भोलि बढ्दो भयो झन् ।
छ बेँसी चिसो झन् कठ्याङ्ग्रिन्छ लेक
कहाँ जान्छ जाडो हटी माघ एक ।।५।

०००
काठमाडाैं