नेपाली हास्यव्यङ्ग्य अनलाइन पत्रिका

अमर सन्तति :

१.
अझै पनि यहाँ दम्भको नै जय हुँदैछ
असतलाई त झन ठूलो निर्भय हुँदैछ
अट्टहास हाँसोसँगै तिनै बेइमानहरूको
भव्य सिन्दुर जात्रा उल्लासमय हुँदैछ ।

२.
कोही छाडा नाँच्दैछन् यहाँ नकचरो बनेर ।
कोही पीडा बाँच्दैछन् यहाँ बिचरो बनेर
मान्छेका र स्वभाव भोगाई पनि थरिथरीका हुने
कोही दाह्रा भाँच्दैछन् यहाँ छिचरो बनेर

३.
फट्याइँ गर्ने एउटा मन्त्र मलाई पनि सिकाइ देउन
बठ्याइँ गर्ने एउटा मन्त्र मलाई पनि सिकाइ देउन
सोझो हुनु त अभिशाप नै रहेछ यो दुनियाँमा
धुर्त्याइँ गर्ने एउटा मन्त्र मलाई पनि सिकाइ देउन।

०००
भक्तपुर