नेपाली हास्यव्यङ्ग्य अनलाइन पत्रिका

दीनानाथ पोख्रेल :

अनन्त प्रेम पाउँदा उठेँ बनेर मानव ।
पुजूँ समस्त मातृ‌मा विशिष्ट बन्छ यो भव ।।
गला कला सिकाउँछिन् भरेर दिव्य चिन्तन ।
समस्त मातृशक्तिमा हजार लाख वन्दना ।।०१।।

लिएर साथ प्रेमको उठाउँछिन् विचारमा ।
दिँदैन जान चेतले कुमार्ग वा विकारमा ।।
उचाल्दछिन् उँभो सधैँ गरेर कष्ट सामना।
समस्त मातृशक्तिमा हजार लाख वन्दना ।।०२।।

रहून् स्वयम् बिहालमा रहन्न कष्ट चेतमा।
रमेर पुत्र उठ्दछन् बहन्छ सौख्य ओठमा ।।
रमून् जहान गेहका भनी गरेर साधना ।
समस्त मातृशक्तिमा हजार लाख वन्दना ॥०३॥

कुकर्मको कुबासना रहन्न कत्ति चेतमा ।
टिपे टपक्क मातृ‌को विचार उठ्छ प्रेममा ।।
डरेर नित्य भाग्दछन् कुचाल दुष्ट भावना ।
समस्त मातृशक्तिमा हजार लाख वन्दना ।।०४॥

बसूँ म मातृ साथमा छुँदैन कष्टले कहीँ ।
अनन्त सौख्यको नदी बहन्छ साथले जहीँ ॥
खपेर कष्टको झरी हँसाउने छ चाहना ।
समस्त मातृशक्तिमा हजार लाख वन्दना ।।०५।।

०००
सुम्बेक इलाम-२, इलाम