नेपाली हास्यव्यङ्ग्य अनलाइन पत्रिका

माधव पोखरेल गोज्याङ्ग्रे :

कालो काग कराउँदै घरमुनि सेतो छु भन्दै थियो
सेतो काग घरी घरी वरिपरी नाँचेर बुझ्दै थियो ।
सोच्दै श्वेत नदी किनार जहिले सेतो बकुल्ला उता
माछा छैन भने उडेर रुखमा आराम गर्ने यता ।

कालो बाहिर भित्र काग जहिले जिस्क्याउँदै शानले
सेतो क्लिष्ट भएर बस्छ घरमा ईमानले ज्ञानले
आफ्नो धर्म निभाउँदै सगरमा उड्दै गरेकाहरू
देखे काग भने घुमेर बिचरा फर्कन्छ सेताअरु ।

हाम्रो गाउँ बजार वा शहरमा काला पसेका कति
भुक्छन् धेर यता उता कुकुर जो सेता रमाका अति
सेतोको ईतिहास मेटिन गयो कालो जमाना भयो
कालो मात्र रुचाउने समयमा सेतो बिरानो चयो ।

क्वैली साथ हुँदा डराउँछ सधैँ सेतो भए तर्सने
कालो फोहरमा रमाउँछ भने चुच्चो त्यही घर्सने
कस्तो जात रहेछ यो जगतमा सेतो विपक्षी सधैँ
निष्टा छैन र ताक्छ मेच उसले उल्टो हिडेको सधै।

बाठो काग कराउँदै गगनमा लाटो बकुल्ला भुँई
विष्टा फोेहर खोज्छ खान उसले माछा बकुल्ला ढुँई
कौवा कर्म बिहीन भो भुवनमा कालो चिनारी भयो
सेतो जीवन यापना समयको त्यो कष्ट खेप्दो भयो ।

०००
उदयपुर गाईघाट