नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´ :

आकाश हेर्दै प्रभुको पुकार्ने ।
जाली यहाँ छन् पद मात्र ताक्ने ।।
नारा र हल्ला गफगाफ चुट्ने ।
मान्छे यहाँ छन् अवतार फेर्ने ।।-१

बोलेर व्यर्थै खुब मक्ख पार्ने ।
लाटा र सोझा जन ठग्नु पर्ने ।।
कस्तो प्रजातन्त्र चल्यो घिसार्ने।
मान्छे यहाँ छन् अतिसार गर्ने ।।-२

तारा खसाल्ने गफ चुट्किला छन् ।
सत्ता नछोड्ने अब योजना छन् ।।
गोष्ठी सभामा लफडा उमार्ने ।
मान्छे यहाँ छन् अधिकार लाद्ने ।।-३

सङ्घीय सत्ता गणतन्त्र ल्याए ।
निर्धा लुलाका सपना हराए।।
को आउला यो जगभार हर्ने।
मान्छे यहाँ छन् कुविचार धर्ने।।-४

छन् लेक बेँसी पहरा कुना छन् ।
झर्ना र खोला छहरा सुसेल्छन् ।।
छन् धूर्त जाली जननी चिथोर्ने ।
मान्छे यहाँ छन् अपराध गर्ने।।-५

रोप्छन् छुराले मुखमा छ राम ।
हेरेर बस्छन् किन कृष्ण श्याम ?
कैयौँ यहाँ छन् छलकर्म रोज्ने ।
मान्छे खुबै छन् अपकार गर्ने ।।-६

०००
बट्टार, नुवाकोट । हाल: बालाजु,काठमाडौँ ।
मोबाइल नं.९८४१७५८१८४