नेपाली हास्यव्यङ्ग्य अनलाइन पत्रिका

जगदीश्वर पोखरेल :

सिकायो बुझायो नजान्ने नसिक्ने
सधैं रोष पोख्ने भनेको नमान्ने
यता बोल्छ नेता छिमेकी खराब
उता खान्छ नेता उसैको सराब ॥१

विदेशी कलाले बनाएर शेष
पुरानै छ पार्टी बदल्दै छ भेष
जता भोज ख्वाए उतै जान्छ भोट
लुटेका लुट्यै छन् बदल्दो छ कोट ॥२

हकारेर खाने छिमेकी भनेको
बडो झुक्छ नेता छ बानी परेको
लुरे स्याल नेता बनी हो झुकेको
कठै! रुन्छ आत्मा छ माटो लुटेको ॥३

उही मक्ख पर्ने गुथेको छ फेटा
पुराना हटाऊ सबै खोज केटा
नयाँ बन्छ नेपाल सोचौं सबैले
चुन्यौँ राष्ट्रघाती बुझेनौँ कसैले ॥४

गए देश नाङ्गै बनाएर टाढा
सदा देशको नै बनोस् स्नेह गाढा
बडा शक्तिशाली युवा छौ हिमाले
मिली रक्त पोखून धरामा युवाले ॥५

बनी देश सेवी धरा यो हँसाओं
युवा शक्तिलाई नयाँ काम लाऔं
छिमेकी छ हेप्दै कुनै काम चुक्दा
उठोस् उच्च माथा बनोस् देश हाँक्दा ॥६

०००
सन्तोषीनगर, काठमाडाैं