नेपाली हास्यव्यङ्ग्य अनलाइन पत्रिका

गायत्री परिरोशनी :

आहा स्वर्ग छ देश
जे चाहिन्छ–त्यही पाइन्छ ।
अल्छी र कामचोरहरुले
थाहा नै नदिइकन,
सुटुक्क अलिकति देश खाइन्छ ॥

साँचोलाई झुटो,
अनि झुटोलाई
साँचो भनिन्छ ।
न्यायमूर्तिको आँखामा
फुलो परेन भने,
दुई –तिहाइलाई
संसद–भवनमा नचाइन्छ,
अनि संविधानका धारा फेरिन्छ ॥

देश स्वर्ग भएपछि,
हरमा कपडा फेर्ने,
हैसिएत नभएर के भो र ?
एक वर्षमै,
दुई–चार वटा
सरकार फेरिन्छ ।
महङ्गो टिकट काटेर
फिल्महलमा किन जानु ?
हरेक टोल–टोलमा
हरेक चोक–चोकमा
सित्तैमा सँधैँभरि,
मुर्दाहरुको
अमुल्य नाच हेरिन्छ ॥

देश नै स्वर्ग भएपछि
विकास र समृद्धिको
नकुरा गरौँ,
खुसीका चित्कारहरुले
ढल बगेको छ ।
वैदेशिक रोजगारमा
१८–५९ वर्ष सम्मकाको
बल बगेको छ ॥

आउनुहोस्,
अझै हामी सबै
एकढिक्का भएर,
संघीयताको सबलीकरण भन्दै,
अलिकति बाँकी रहेको
संस्कार र सभ्यतालाई
सजिलै सबैले
पुर्न सक्नेगरि,
गहिरो खाडल
खनाउन बाँकी छ ।
विकासले गाउँ सबै
रित्तिइसके,
लास आफैँ उठेर
घाटसम्म जानसक्ने,
बनाउन बाँकी छ ॥

०००
स्याङ्जा