ईश्वर पाेखरेलमहापुरुष
कोही नमस्ते गन्ती गर्छ मख्ख पर्छ : फुर्किन्छ कोही सरकार ढल्दा, बन्दा बढ्छ : ह्वात्तै हुर्किन्छ । एउटा अग्लो, अर्को मोटो अर्को मख्ख मसलमा काँटकाँटका महापुरुष हाम्रै चिया पसलमा ।
ईश्वर पोखरेल :
एउटा अग्लो, अर्को मोटो
अर्को मख्ख— मसलमा
काँटकाँटका महापुरुष
हाम्रै चिया पसलमा ।
एउटा खान्छ, सधै खान्छ
पैसो कहिल्यै तिर्दैन
अर्को मात्छ; यत्ति मात्छ—
लाग्छ— फिर्छ, फिर्दैन !
कोही विगतको ब्याज खान्छ
कोही आगतको उधारो
कोही अहिल्यै मालामाल
तान्यातान्यै : चटारो ।
कोही ‘कविता लेख्छु’ भन्छ
लेख्छ गाईको निबन्ध
कोही ‘राजनीति गर्छु’ भन्छ
गर्छ आफ्नो प्रबन्ध ।
कोही सधै चिया पसलमा
गुड्डी हाँक्छ; कुर्लिन्छ
कोही नेताले एउटा धापमै
दङ्ग पर्छ : उर्लिन्छ
कोही नमस्ते गन्ती गर्छ
मख्ख पर्छ : फुर्किन्छ
कोही सरकार ढल्दा, बन्दा
बढ्छ : ह्वात्तै हुर्किन्छ
एउटा अग्लो, अर्को मोटो
अर्को मख्ख मसलमा
काँटकाँटका महापुरुष
हाम्रै चिया पसलमा ।
०००
बोझेपोखरी, ललितपुर
‘रचना’ (फागुन चैत अङ्क,२०८०)
Subscribe
Login
0 Comments
Oldest
