नेपाली हास्यव्यङ्ग्य अनलाइन पत्रिका

जगदीश्वर पाेखरेल :

दले काम कालो धसे स्वार्थ जाग्यो
खुला भ्रष्टचारी बढे साँध नाघ्यो
अहो ! धूर्तवादी असाध्यै गनाए
लुटे देशलाई भकुण्डो बनाए ।।१

कुरा मात्र ठूला फटाहा दलाली
बरा देशवासी हुँदै छन् हलाली
छिपेका कुकर्मी उठे सल्बलाए
बरा राष्ट्रलाई भकुण्डो बनाए ।।२

खुराफाती गर्ने लुकी देश भित्र
झुकी भोट माग्छन् यही हो विचित्र
चुसे रक्त मज्जा र सोझा फँसाए
सदा मातृ धर्ती भकुण्डो बनाए ।।३

मिली दुष्ट गुन्डा गुतार्छन् रमेर
कहाँ बोल्न सक्छन् परेमा जमेर
गरे स्वार्थ पूरा र वैरी हँसाए
लुटे देशलाई भकुण्डो बनाए ।।४

सधैँ बस्न सत्ता गुहारे छिमेकी
लुटी देश खाने हुँदैनन् विवेकी
खुराफात गर्नेहरूले भसाए
लुछी देशलाई भकुण्डो बनाए ।।५

०००
पाउँदीबजार, लमजुङ
सम्प्रति-सन्तोषीनगर, कलङ्की