नेपाली हास्यव्यङ्ग्य अनलाइन पत्रिका

डा. बमबहादुर जिताली :

छन्द, रस, अलंकार पर-पर सार्नु
नबुझिने भाषा लेखी अलमल्ल पार्नु
हिन्दी, उर्दू, अंग्रेजीको उल्था गर्नु अनि
आफ्नै नाउँमा छपाउनु आफ्नै कृति भनी ।

लक्षणा र व्यञ्जनाले अर्थ खुल्नु हुन्न
दर्जा हेरी पिलाउनु हुने गरी टुन्न ।
विश्लेषण गराउनु बनाएर ग्याङ
आफूआफू मिली आफ्नै फुक्नुपर्छ ढ्वाङ ।

जति चोर्न सक्यो उति चर्चा ठूलाे हुन्छ
जति लुट्न सक्यो उति ख्याति प्राप्त हुन्छ
गिराएर छाड्नुपर्छ पद्य – कविलाई
जस्तो पनि बोल्नुपर्छ चर्चित हुनलाई ।

आफ्नो ग्याङ बाहिरका कविलाई न्याक्नु
सरल र सरसिला काव्यलाई फ्याँक्नु
लय – युक्त कविताको जरो समेत खन्नु
जस्तो मौसम बदलिन्छ तेस्तै-तेस्तै बन्नु ।

चहकिला कृति पाए फायलमा दाप्नु
आफ्नो संस्थाबाट आफ्नो कृति मात्र छाप्नु ।
चाकडी र चाप्लुसीको जान्नुपर्छ कला
शक्तिमाथि भक्ति गाउने हुनुपर्छ गला ।

मौकावादी बन्नुपर्छ पुरस्कार पाउन
जाँगरिलो हुनुपर्छ ठाउँ – ठाउँ धाउन
जति-जति धाउन सक्यो उति फाइदा गर्छ
यति काइदा जानेपछि तक्मा पनि झर्छ ।

०००
रानीवन, काठमाडाैं