नेपाली हास्यव्यङ्ग्य अनलाइन पत्रिका

हाेमनाथ घिमिरे :

छैनन् शक्ति युवा विदेशतिर छन् रित्तो छ बस्ती घर ।
बढ्दै छन् अझ बाध्यता गरिबका छोडेर जाँदा पर ।
फर्किन्छन् कहिले यहाँ अब सबै यो प्रश्न सोध्दै छु म !
नेता पाल भयो कठै ! मुलुक यो नेपाल खोज्दै छु म !

शान्तिक्षेत्र थियो यहाँ विगतमा सम्बन्ध गाढा थियो ।
कोही शत्रु थिएन विश्वभरमा षड्यन्त्र टाढा थियो ।
छैनन् चिन्तन राष्ट्रनिम्ति दलमा आश्चर्य सोच्दै छु म !
नेता पाल भयो कठै मुलुक यो नेपाल खोज्दै छु म !

हाम्रा शैलहिमाल उच्च छहरा हुन् सृष्टिका गायक ।
हाम्रा पूर्वज ती सबै ऋषि थिए आध्यात्मका नायक ।
गर्थे ध्यान सदैव तत्त्व शिवको, ती ज्ञान रोज्दै छु म !
नेता-पाल भयो कठै मुलुक यो नेपाल खोज्दै छु म ।

फर्केनन् किन खै जहान घरका सारा हराए कहाँ !
बिर्सेमा कसरी रहन्छ अब यो अस्तित्व संसारमा ।
आओस् वीर कुनै बनेर रणमा विद्रोह रोप्दै छु म ।
नेता पाल भयो कठै मुलुक यो नेपाल खोज्दै छु म !

सत्तामा जति छन् पुगे महलमा आँफै बने मालिक ।
बन्दै छन् अहिले सबैतिर अहो ! लौ स्वर्णका सालिक ।
छैनन् न्याय उपाय मिल्छ कसरी त्यो मार्ग खोप्दै छु म !
नेता पाल भयो कठै मुलुक यो नेपाल खोज्दै छु म !

०००
२० फागुन, २०८१
भरतपुर, चितवन