नेपाली हास्यव्यङ्ग्य अनलाइन पत्रिका

गायत्री परिराेशनी :

खानकै लागि जन्मियौँ
खाएरै हुर्कियौँ ।
अब खान किन डराउनु ?
जातियताको तक्मा भिरेर खाऔँ
आफैँसँग गिरेर खाऔँ
सुटुक्क कतै छिरेर खाऔँ ॥
बोटमा हुनेले हाँगा भाँचेर खाऔँ ।
भूँईमा हुनेले जरा उखेलेर खाऔँ ।

सत्कर्म भनेकै खानु भएपछि,
चिन्ता सबै छोडेर खाऔँ ।
नैतिकताको बाकस फोडेर खाऔँ
वाचावन्धन तोडेर खाऔँ ॥
दुई नम्बरी काम खोजेर खाऔँ
मिल्ने ठाउँमा रोजेर खाऔँ ।
निर्धालाई गोदेर खाआँै
विवेकको ताल्चा फोरेर खाऔँ ॥

सबैको सिद्धान्त खानु नै हो भने
फुटाएर होइन जुटाएर खाऔँ ।
दलका विवाद सबै टुटाएर खाऔँ
संविधानका धारा छुटाएर खाआँै ॥
खाने नै हो किन लुकेर खानु ?
देखाउन मिल्ने नजिर बनाएर खाऔँ ।
प्रतिपक्षलाई समेत मनाएर खाऔँ
खाने दल दर्ता गराएर खाऔँ ॥

बाँच्नुको अभिष्ट खानु भएपछि,
जाँगर हुनेलाई विदेश छिराएर खाऔँ ।
अल्छीहरुले देश गिराएर खाऔँ
इमान्दारहरुलाई हतकडी लगाएर खाऔँ ॥
बाँच्ने कति हो थाहा छैन त्यसैले,
आफ्नो मनले मानुञ्जेल खाऔँ ।
आफ्नै छालाले धानुञ्जेल खाऔँ
भो अब त खान्न भनुञ्जेल खाऔँ ॥

०००
स्याङ्जा