नेपाली हास्यव्यङ्ग्य अनलाइन पत्रिका

धीरेन्द्र प्रेमर्षि :

पुगिसक्यो मान्छे भई बाँच्ने अब मिति
कसो होला भन् त बुढी थाले राजनीति ?

सिद्धान्तको बर्को ओढी ल्याउन पाइने फूट
सिद्धान्तकै घोडा चढी गर्न भ्याइने लूट
गन्हाएरै भए पनि पाइने परिचित
कसो होला भन् त बुढी थाले राजनीति ?

चुनाउअघि नैतिकताको कसम खाइदिउँला
जनता भन्या जन्तु न हुन्, धोती लाइदिउँला
जता खीर, उतैतिर सपारौंला थिति
कसो होला भन् त बुढी थाले राजनीति ?

हात्ती-गैंडा ओच्छ्याएर त्यसैमाथि ढल्लिस्
लाखौँ पर्ने लिपिस्टिक थुतुनोमा दल्लिस्
हररर पजेरोमा, लाउँला मायाप्रीति
कसो होला भन् त बुढी थाले राजनीति ?

०००
सिराहा, वस्तीपुर- हाल काठमाण्डौ