नेपाली हास्यव्यङ्ग्य अनलाइन पत्रिका

कपिल अज्ञात :

जोकरको अर्थ हो – उटुङ्ग्याहा
सर्कसको जोकर लवरपाँडे बनेर हँसाउँछ
तासको जोकर जोड मिलेकोलाई जोड दिन्छ
र एकाएक बाजी पल्टाउँछ
खेलमा उसको एकमात्र भूमिका हुन्छ
जहाँ जोड देख्छ त्यहीं परिणाम लेख्छ ?
जोड भएन भने फाल्तु बनेर
आफ्नो अस्तित्व मेट्छ

जोकरको भूमिका
सर्कस र तासमा मात्रै होइन
राजनीतिमा पनि हुने रहेछ
जो मैं हूँ भन्छन्
ती पनि जोकर हुँदा रहेछन्
जो निकै ठक्कर दियौँ भनेर घमण्ड गर्छन्
तथाकथित नायकहरू
कम्पनीका ठेकेदार त छँदै थिए
राजनीति नै उद्योगव्यवसाय भएकाले
अचेल ती जोकरझैं छन्
जो खेलमा एकाएक बाजी मार्न उद्यत छन्

नेताको नामबाट ठेकेदार
ठेकेदारको नामबाट फेरि जोकर हुँदै
मदारीबाट तालिम प्राप्त वानर झैं
आफै मालिक छु भन्ने दम्भमा
आफैलाई कर्णाधार सम्झनेहरूको
चरित्र उदङ्ग्याएर हेरे स्पष्ट हुन्छ ।

इतिहासकै उटुङग्याहा जोकर
गठबन्धनको योजना बुनेर
जो आफूलाई महान खेलाडी सम्झिरहेछन्

यथार्थमा ती खेलाडी हुन् कि अनाडी
वर्तमान बोल्न नसके पनि
भविष्य बताउला
इतिहासले झुटको खेती गर्न छोडेको बेला
कुनै दिन नयाँ सूर्य उदाउला ?

०००
चितवन
कविता क्षितिज (२०८२)