नेपाली हास्यव्यङ्ग्य अनलाइन पत्रिका

कपिल अज्ञात :

जो भयानक हतियार बनाउँछ
हतियारहरूको भण्डारण गर्छ
बाहिरबाहिरै लोकतन्त्र र मानवताका
गीतहरू सुनाउँछ, नाटक गर्छ
भित्रभित्रै हतियारहरूको दोकान खुलाउँछ
ग्राहकहरू बढाउँदै गर्छ
भूमिगत बजार नै बसाउँछ
उहिल्यैदेखि चल्दै आएको छ
उसको मूल नीति
फुटाउ र राजगर ।

परस्पर शत्रुभावका देशहरूको खोजी गर्छ
तिनैलाई पक्षविपक्षमा घोषित गर्छ
पक्षलाई पोषित गर्छ
विपक्षलाई शोषित गर्छ
र भन्छ अधिकारका निम्ति हतियार उठाऊ
मौका मिल्ने बित्तिकै पुर्पुरोमा बजाऊ
यही शङ्खनाद गर्दै
बारबार उक्साउँछ
भ्रमका सन्देशहरू फिजाउँछ
जब पक्षले हरेश खाने देख्छ
उही विपक्षी युद्ध अपराधी हो भनेर लेख्छ
त्यसैमा वहस गर्छ
अदालतले पनि उसैका इशारामा फैसला गर्छ ।

०००
चितवन