हाेमनाथ घिमिरेविश्वास लाग्दैन है !
थाली भोजनमा विदेशतिरकै मिष्ठान्न हुन्छन् सदा । गर्छौ मोज बिहान रात अथवा उस्तै छ मस्ती दिवा । तिम्रो यै अभिमानले मुलुकको सर्वस्व गुम्दैछ है ! दिन्नौँ ठाउँ कतै यहाँ मुलुकमा विश्वास लाग्दैन है !
होमनाथ घिमिरे :
बेच्यौ उद्यमका थिए मुलुकमा आधार हाम्रा जब ।
सत्ताभित्र लुछाचुडी कति ग-यौ खायौ लुट्यौ गौरव ।
बोल्छौ मात्र झुटो हरेक दिनमा सम्मान जाग्दैन खै !
गर्दैनौ शुभ कर्म यो मुलुकमा विश्वास लाग्दैन है !
छैनौ कत्ति इमानदार जसरी नेतृत्त्व तिम्रो अब ।
मानौँ पो कसरी र उत्तम भनी ठान्नू सधैँ गौरव !
हिंसा मानिसको ग-यौ धन लुट्यौ खायौ पचायौ कि खै !
छैनन् लक्षण कत्ति फेरि गतिलो विश्वास लाग्दैन है !
आओस् व्यक्ति नयाँ विचार गतिलो यो राष्ट्र हाँक्नेगरि ।
फाँडोस् भ्रष्ट जहाँ अघोर खलको झाडी बनेलीसरी ।
भागोस् विघ्न सबै; परन्तु यसरी सद्भाव जाग्दैन खै !
चिन्दैछौँ अहिले सदैव झुटका विश्वास लाग्दैन है ।
छैनन् न्याय समान यो मुलुकमा निर्दोष छन् दण्डित ।
छैनौ विज्ञ; उदण्ड छौ मगजका, बन्छौ स्वयं पण्डित ।
तिम्रो चर्तिकला हरेकथरिका फेरिन्न फेरिन्न खै !
पैसा निम्ति सदैव पागल तिमी विश्वास लाग्दैन है।
थाली भोजनमा विदेशतिरकै मिष्ठान्न हुन्छन् सदा ।
गर्छौ मोज बिहान रात अथवा उस्तै छ मस्ती दिवा ।
तिम्रो यै अभिमानले मुलुकको के बाँच्छ माटो र खै !
दिन्नौँ ठाउँ कदापि यो मुलुकमा विश्वास लाग्दैन है !
०००
भरतपुर चितवन
५ भाद्र,२०८२
Subscribe
Login
0 Comments
Oldest
