नेपाली हास्यव्यङ्ग्य अनलाइन पत्रिका

जगदीश्वर पाेखरेल :

चढ्दै छन् किन रोग दैनिक चुली के छन् बुझौँ कारण ।
खान्छौँ भोजन शुद्ध वा जहरिला को गर्छ खै तारण ।।
तर्कारी हरिया विषाक्त कति छन् बोल्दैन सत्ता किन ।
हाल्छन् धेर किसानले विष कडा जाँच्नै पऱ्यो दिन्दिन ।।१

छर्छन् नित्य किसानले विष घडा गर्छौँ कुरा आपस ।
भान्सामा विष पाक्छ दैनिक जसो खान्छौँ सबै मानिस ।।
जाँच्ने खाद्य भएन चेत जनमा झन् व्यस्त भो’ फुर्सद ।
वृद्धा बालक यौवना सकलमा बढ्दै छ यो अर्बुद ।।२

माटोमा पनि रोग लाग्छ विषले उब्जा स्वयं घट्दछ ।
रोगी मानिस बन्छ छर्छ जसले छिट्टै चिता चढ्दछ ।।
कार्वाही किन हुन्न बेच्न नहुने छद्मी कला भेषमा ।
तर्कारी फलफूल अन्न विषले आक्रान्त छन् देशमा ।।३

केरा आँप अनारमा कटरमा हालेर बेच्छन् विष ।
जाँच्ने हो सरकारले कृषकले हाले लिँदैनन् इख ।।
रोगीको उपचार गर्छ कसले सम्पन्न छैनन् सबै ।
कस्तो हो सरकार रुष्ट अति छन् नेपालवासी सधैँ ।।४

रोगी छन् कति रक्तचाप दमका खाँदा विषादी बढे ।
रोगी छन् मधुमेहका जहरले गर्दा बिरामी परे ।।
छोडौँ हाल्न किसानले विष कडा बिक्ने छ सर्वाधिक ।
तर्कारी फल अन्न शुद्ध रसिला चाहिन्छ अर्गानिक ।।५

०००
लमजुङ, हाल सतुङ्गल काठमाडाैं