नेपाली हास्यव्यङ्ग्य अनलाइन पत्रिका

गायत्री लम्साल :

बडादशैँले सबैको मनलाई ठूलो बनाओस्
अल्छिका हनुमानहरुलाई धूलो बनाओस् ।
असललाई खराब देख्नेहरुको आँखा फूटोस्
लुटेराहरुको खेतीलाई असिनाले चुटोस् ।।

बार्है घण्टा कुरा काट्नेहरुको रोजगारी गुमोस्
पौरखी हातहरुले प्रगतिको शिखर चुमोस् ।
देश बनाउन विदेशीहरुसँग भिख नमागुन्
देश बनाउने जनशक्ति अब विदेश नभागुन् ।।

पुराना देशभक्त नेताहरुको जागिर सकियोस्
भाषणले आसन पाइन्छ भन्ने चिन्तन भत्किओस् ।
पारिवारिक मायाममता छताछल्ल चुलिओस्
पावर र पदले सबैथोक हुन्छ भन्ने अब भुलिओस् ।।

सबैका मन र मष्तिस्कमा विकास गर्ने जाँगर फलोस्
सुशासन, विकास, समृद्धि र शान्तिको बत्ती बलोस् ।
न्याय फलोस् अन्यायको बोट सधैँलाई मरोस्
बडादशैँले खुशी, सुखी र आनन्दका घैँटा भरोस् ।।

०००
स्याङ्जा