राजेन्द्र घायलकुकुरहरुको विरोधपत्र
हामी मानिस बन्नुछैन कहिल्यै जे छौं हुनेछौँ उही मान्छेले बहुभेष धर्दछ बडो लाएर खोक्रो फुइँ हामी जत्ति इमानदार छ कहाँ मैमत्त भो व्यर्थको हाम्रो नाम नकाढ हे मनुज हो सुन्दा सुहाउन्न त्यो ।
राजेन्द्र घायल :
हामी बाध्य भयौं र बैठक बसी गर्नै पर्याे निर्णय
लेख्यौँ आज विरोधपत्र यसरी मान्छे बुझून् आशय
छाडे बोल्न भएर सभ्य किन हो भुक्छन् सदा मानिस
ठूला मालिकका जुठो अनि पुरो ढुक्छन् सदा मानिस ।
यौटा मानिस झोक्किँदै कुकुर होस् भन्दै छ अर्कोकन
अर्को मानिस भन्छ तैँ कुकुर होस् घोक्रो फुलाई झन
हाम्रो नाम स्वभाव लुट्छ यसरी मान्छे गरी गर्जन
गर्नेपर्छ कि झैं भयो अब यहाँ सङ्घर्ष आन्दोलन ।
हड्डीका टुकुरा मिल्यो यदि भने हामी भुकी लड्दछौं
कुर्सीका सुकुटी सुँघेपछि खुवै मान्छे लडे देख्दछौं
गर्छन् डार्र र ङुर्र मानिसहरू हाम्रै गरी नक्कल
मान्छेको पहिचान खै ? कुकुर भै गुम्दैगयो सक्कल ।
हामी मानिस बन्नुछैन कहिल्यै जे छौं हुनेछौँ उही
मान्छेले बहुभेष धर्दछ बडो लाएर खोक्रो फुइँ
हामी जत्ति इमानदार छ कहाँ मैमत्त भो व्यर्थको
हाम्रो नाम नकाढ हे मनुज हो सुन्दा सुहाउन्न त्यो ।
हामी चेतनशील भन्छ तर खै संस्कार नै पत्रु भो
मान्छेमाझ छ जालझेल लफडा मान्छे स्वयम् शत्रु भो
हाम्रा नाम स्वभाव यी नलुट है बिन्ती छ हे मानिस
लेख्यौँ आज विरोधपत्र यसरी उठ्दैछ चर्को रिस ।
०००
चितवन
घायलको घुयेँत्राे (२०८१)
Subscribe
Login
0 Comments
Oldest
