नेपाली हास्यव्यङ्ग्य अनलाइन पत्रिका

डा. रामप्रसाद ज्ञवाली :

घनघोर थियो वर्षा दिउँसै रात झैँ थियो
निरीह जीवका निम्ति जिन्दगी त्रास झैँ थियो
कहाली लाग्दथ्यो हेर्दा एकान्त वन जङ्गल
बाघ भालु र ब्वाँसोका घुम्दथे दलका दल ।

आक्रान्त वनका माझ जन्माई शिशु कोमल
सुत्केरी मृगिनी यौटी तर्सन्थी पलका पल
चट्याङ पर्दथ्यो चर्को गर्जन्थ्यो क्रूर बादल
भयभीत थिई आमा तप्कन्थ्यो आँसुको जल ।

अचानक कँपाएर वनको जनजीवन
सुनियो सिंहको चर्को आतङ्कसरि गर्जन
कलिलो शिशुको सारा अङ्ग जिरिङ्ग थर्कियो
सुत्केरी मृगको पीडा आँखाबाट छचल्कियो ।

सामुन्ने सिंह गर्जन्थ्यो नङ्ग्रा लिएर निर्दय !
डराई मृगिनी च्याप्थी छातीमा शिशु कोमल !
सिंह बढ्दै गयो सुस्त सुत्केरी मृगिनीतिर !
जिन्दगी खोज्दथी आमा मृत्यु आयो झनै वर !

वनको माझमा यौटी सुत्केरी मृगिनी कठै !
न भिड्नै सक्दथी आफू न सक्थी भाग्न नै कतै !
आयो आइरह्यो सिंह पुग्यो जब नजिकमै
बच्चा च्यापी अँठ्याएर चिच्याई मृगिनी कठै !

सिकारी सिंह त्यो आयो झनै नजिकमा जब
जानेभो प्राणझैँ लाग्यो लाग्यो नि सकियो सब !
नपरोस् देख्न नानीको मृत्यु आफू छँदाछँदै
सोचेर बिचरी आमा चिम्लिन्छे नेत्र ती दुवै !

सिंह आई जसै छोयो मृगिनी हिउँझैँ जमी
जिउ भूकम्पझैँ काँप्यो आँखा बने चिसो नदी
“लतार्छ लुछ्छ यो सिंह घिसार्छ मार्छ हा ! अब
बाँच्ला खै कसरी नानी खान्छ चोक्टा गरी सब !”

सोचेर मृगिनी च्याप्छे बच्चा झन् झन् गरी बल
परन्तु सिंहले खोस्यो काखको शिशु कोमल !
खोस्यो तान्दै जसै बच्चा गरेर सिंहले बल
हिउँ भई जमी आमा बगाई आँसुको भल ।

दयाको भिख मागेर अश्रुधारा बगाउँदै !
जोड्दछे मृगिनी हात थर्र ओठ कँपाउँदै !
अचम्म ! के भएको हो ? विश्वासै हुन्नथ्यो तर
लाग्थ्यो आश्चर्य नै किन्तु त्यो थियो सत्य नै सब !

आठौँ आश्चर्य झैँ लाग्यो मृगिनी हेर्दछे जब
आफ्नो बच्चा थियो शान्त सिंहको काखमा तब !
के आश्चर्य भयो यस्तो खाँदैन मृगले शिशु ?
मुसार्थ्यो उसले गाला उल्टै हाँस्दै हुँदै खुसी ?

राखेर शिरमा पन्जा आशीर्वाद दियो जब !
मृगिनी पर्दछे छक्क देखेर यो असम्भव !
च्यातिन्छन् उसका आँखा देखी यस्तो असम्भव !
विपना सपना लाग्छ, सपना बिपना सब !

मरिसकेँ कि ज्युँदै छु ? हो कि झैँ ह्वैन झैँ पनि ?
के मृत्यु पग्लियो आज चट्टानी झरना बनी ?
आशीर्वाद दियो फेरि र हाँस्दै सिंह त्यो गयो !
सुत्केरी मृगिनीलाई अनौठो स्वप्नझैँ भयो !

केही दिनपछि उल्ले सुनी खबर यो नयाँ
सबै जङ्गलका प्राणी भेला भई समूहमा
“जङ्गली राज्यको राजा को हुने ?” यसखातिर
गर्थे प्रचार आआफ्नो “चुनाव” जित्नखातिर !?

०००
काठमाडाैं