नेपाली हास्यव्यङ्ग्य अनलाइन पत्रिका

रामप्रसाद ज्ञवाली :

खबरदार ! बोल्न मनाही छ
शान्त भएर बस
म डोजर !
आधुनिक कविता लेख्दै छु !
कालो बादल छ रे आकाशमा !
छ भने छ, तिमीलाई के ?
पानी दर्किरहेछ रे लत्ताकपडामा !
छ भने छ, तिमीलाई के ?
भोकै छन् रे पेटहरू !
छन् भने छन्, तिमीलाई के ?
बढ्दै छन् रे थुनछेकहरू !
छन् भने छन्, तिमीलाई के ?
सन्त्रस्त-अस्तव्यस्त छ रे जीवन !
छ भने छ, तिमीलाई के ?
मर्माहत छन् रे हजारौँ मनहरू !
छन् भने छन्, तिमीलाई के ?
आँखाभरि आँसु छ रे !
छ भने छ, तिमीलाई के ?
छातीभरि क्रन्दन छ रे !
छ भने छ, तिमीलाई के ?
केहीले त आत्महत्या गरे रे !
गरे भने गरे, तिमीलाई के ?
…. !!!..
बोल्ने होइन है बढी भएर !
कसले भनेको थियो तिमीलाई गरिब घरमा जन्मन ?
कसले भनेको थियो तिमीलाई सुकुम्बासी हुन ?
कसले भनेको थियो तिमीलाई गरिब बन्न ?
खबरदार ! बोल्न मनाही छ
शान्त बएर बस
म डोजर !
आधुनिक कविता लेख्दै छु !

०००
कीर्तिपुर