नेपाली हास्यव्यङ्ग्य अनलाइन पत्रिका

घनश्याम रेग्मी :

पदमै बसुँला मन आस थियो
पद जान्छ कि वा मनमा छ चिसो
यतिसम्म अडेँ पदकै जिदमा
किन ऐठन हुन्छ सधैँ निँदमा ।

पदमा रहँदा कति खेल भए
रुपियाँ सुविधा भरमार थिए
कति मस्त झुलेँ अघि सो पिङमा
किन ऐठन हुन्छ सधैँ निँदमा ।

कति दान दिएर खुसामदले
भरथेग गरेँ अघि यो पदले
कति दाल तयार गरेँ हिँङमा
किन ऐठन हुन्छ सधैँ निँदमा ।

सब मस्त सुते अब रात भयो
निँद छैन यता बरबाद भयो
सकिएछ सुरा कि छ खै पिँधमा
किन ऐठन हुन्छ सधैँ निँदमा ।

सपना पनि खै किन हो किन हो
हर बार उही अघिकै छ अहो !
अझ घाउ असह्य छ यो रिडमा
किन ऐठन हुन्छ सधैँ निँदमा ।

पछि काम दिने धन जोर्न सके
मनमा अभिलाष यसै छ सखे
कसरी अब उत्रिनु खै रिङमा
किन ऐठन हुन्छ सधैँ निँदमा ।

म छु दाइ भनी जुन आउँदथे
र सलाम गरी गुन गाउँदथे
अब ती कमिला न फिरे गुँडमा
किन ऐठन हुन्छ सधैँ निँदमा ।

०००
विकास चोक ५, चितवन