नेपाली हास्यव्यङ्ग्य अनलाइन पत्रिका

​लक्ष्मण नेवटिया :

सस्तो छनोटको तिर्नु पर्ला महँगो मोल,
चुनाव छ गम्भीर, नहोस् कुनै अल्झोल।
क्षणिक लोभमा फसेर नबेच्नुस् भविष्य,
आफ्नो सौभाग्यसँग नखेलौँ गोलमोल।।

​सुयोग्य निधारमा लाउनु छ, विजयको टीका,
एकताबद्ध भइ पार्नु छ, बिकाउलाई फिक्का।
भ्रमका जाल च्याती, एकताको दीप बाल्नुस्,
मन जितेकालाई जिताऔँ, भएर एक ढिक्का।।

अँध्यारो कुनामा गरिएमा स्वार्थी वार्तालाप।
वा गरिए भागबन्डाको घिनलाग्दो मेलमिलाप,
भ्यागुतोको धार्नी राखेमा विवेक तराजुमा,
निश्चित हुनेछ टाउको समाई पश्चात्ताप।।

रुपैयाँ, रक्सी अनेक प्रलोभन हुन् घातक,
लडाउने-भिडाउने गर्छन् विभिन्न नाटक।
मुखौटा हटाई सत्य रोज आत्माको साक्षीमा,
छान्नुस् उपयुक्त नायक, लगाई ध्यान त्राटक।

०००
विराटनगर