नेपाली हास्यव्यङ्ग्य अनलाइन पत्रिका

गायत्री लम्साल :

राम्रोलाई होइन भोट चाम्रोलाई दिनोस्‌
सबैदलको साझा हाम्रोलाई दिनोस् ।
भव्य भ्रष्टाचार गर्न सक्नेलाई दिनु
जिउँदै पटक पटक मर्न सक्नेलाई दिनु ॥

गर्न नसक्ने कुरा बोल्न सक्नेलाई दिनु
गरेका कुकर्मले जेलमा सड्न सक्नेलाई दिनु ।
भोट भोट नै हो मन फुकाएर दिनु
केही पाइन्छ भन्ने आस टुटाएर दिनु ॥

बिना सर्त जेलबाट छुट्नेलाई दिनु
म ट साह्रै असल भनी भ्रम भुट्नेलाई दिनु ।
आलो रगत र पसिना खानेलाई दिनु
अर्काको घर परिवार विगार्न जानेलाई दिनु ॥

भोट भोट नै हो आँखा चिम्लेर दिनु
देश बन्न र बनाउन नदिनेलाई दिनु ।
काम नै नगरि देश लुट्न सक्नेलाई दिनु
गुण, इमान र नैतिकतामा फुट्न सक्नेलाई दिनु ॥

मानवताको बली चढाउनेलाई दिनु
बिऊ विनाका बोटविरुवा बढाउनेलाई दिनु ।
सभ्यता र संस्कृति सढाउनेलाई दिनु
जितेपछि भूत झैँ हराउनेलाई दिनु ॥

असहाय, गरीब र पीडित पिट्न सक्नेलाई दिनु
अन्याय र अत्याचारले थिच्न सक्नेलाई दिनु ा
मिडियामा भ्रमको खोलो बगाउनेलाई दिनु
स्वदेशभित्र विदेशी कुकुर हगाउनेलाइ दिनु ॥

०००
स्याङ्जा