नेपाली हास्यव्यङ्ग्य अनलाइन पत्रिका

गायत्री लम्साल :

आहा उन्नतीले ह्‌वात्तै शुली चढ्यो
रोजगारीका भकारी चुलिए ।
कोही थुनिनेमा जागिरे
कोहि हुलिनेमा जागिरे
कोही आन्दोलनकारीमा नियुत्त
कलाकारको कुरै छोडौँ
युटुबकारको फालाफाल ।
आधुनिक विकासे काम
जे भेटिन्छ त्यही बालाबाल
सडकको बीचमा हात हालाहाल॥

वा कमालका हामी रोजगारे
भोक लागेको बेला
मुखमा स्पोन छिराउने हो,
सोसल मिडिया सबै आउने
स्याउफोन हातले खेलाएर
जे — जे आउँछ शब्दका गोली
बर्साउने काम हो,
गाली नगर्नोस् महाशय
कमेण्डकार नै,
यो जागिरको नाम हो ॥

अब त आफू जस्तै खाडीका
बीस लाख मस्तले स्वदेश आइन्छ ।
बाँझो जमिनको माटो छुन त
हामीलाई पनि मन छैन हजुर
भन्नोस् न अरु बाँकी रहेका
कुन— कुन कारमा जागिर पाइन्छ ?

०००
स्याङ्जा