नेपाली हास्यव्यङ्ग्य अनलाइन पत्रिका

हाेम सुवेदी :

केही अङ्गहरु फेरी तरो ताजा भए पनि
कानले काम गर्दैन के बसूँ बहिरो बनी ।।

नेत्र ता फेर्न पाइन्छन् फेर्न कानै नपाइने
सुख समृद्धिका गाना सुनेरै नअघाइने ।।

हल्लाले मित्रहो चाँडै बहिरो म हुने भएँ
सुख समृद्धिको स्वप्ना देख्न वञ्चित मै भएँ ।।

यसैले फेर्न चाहन्छु आँखा कान दुबैतिर
जनतालाई बाँड्नेछु सुखसमृद्धिको खिर ।।

उदार दिलको दाता भए म कान फेर्दथें
चस्माको बिँड अड्काई सारा संसार हेर्दथें ।।

मुटु चल्दैन भन्दैछन् गर्छन् डाक्टर गन्गन
मृगौलाे फेरिए जस्तै मुटु फेर्ने भयो मन ।।

०००
भद्रपुर, झापा