नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

फर्सी ठूलो चिरिएर चउरमा झर्यो
धेरै फर्सी फलाउनेलाई चिन्ता पर्यो ।
फर्सी फुट्यो, जुट्यो भन्छन् भेट्‌नो भेटिएन
कुहिएको फर्सी किन्दा भित्र हेरिएन ।

बियाँ सबै चलेका छन् चलचित्रको चालमा
दुनियालाई पारेका छन् माकुराको जालमा ।
भेट्नालाई भाँडेका छन् ठेट्नाहरू मिली
झिक्रामाथि देखिएनन् चमेली र बेली ।

फर्सी फल्यो लहरामा, पहरामा भेट्ना
भेट्‌नोलाई भेट्टाउन दौडेका छन् ठेट्ना ।
जताबाट हावा चल्यो पात उतै ढल्के
बियाँ जति कमिसन खान निकै पल्के ।

अर्गानिक फर्सी खेती मुलुकमा मासे
प्रकृतिमा नफलेका भए आसेपासे ।
पश्चिमको उज्यालोमा भाले-पोथी बासे
आफ्‌नो कर्म, संस्कृति र धर्म पनि नासे ।

गउँत र गोबरमा नहुर्केको बोट
भद्रगोल भण्डारमा थियो निकै खोट ।
कुहिएको फर्सी फुट्यो, फुट्नै पर्ने थियो
युरियाले मौलाएको फर्सी विना मियो ॥

धन्य ईश्वर ! हे परमेश्वरी
फर्सी किन सडेका यसोरी ?

०००
जहाँ छन् बुद्धका आँखा (२०७८)