नेपाली हास्यव्यङ्ग्य अनलाइन पत्रिका

रामप्रसाद अर्याल :

अल्गोरिदमको जालो फैलियो जगतै भरी।
बारीको खेती खाएर बढेका मर्कटै सरी ।।
दन्काएर ठुलो ज्वाला दाबानल विनाशको ।
नाचेर ताण्डब नृत्य मनाए मधुमास यो ।। १

आरोप रोपी बारीमा दम्भले विध्वंश बढ्याे ।
दम्भले स्तम्भ नाघेर धुराेमाथ शुराे चढ्याे ।।
पद लालचका भोगी लाेभीका वशमा परे ।
जनता गम खाएर चित खाइ भाेकै मरे ।। २

मानो रोपी मुरी फल्ने आषाढ महिना अरे ।
गुप्त बात छताछुल्ल रनभुल्ल सबै परे ।।
ओद्योगिक गरी क्रान्ति विकासे पथ खन्नु छ।
गमलामा रोपी धान आत्मनिर्भर बन्नु छ ।।३

नयाँ प्रविधिको सार प्रहार मुटमा भयो ।
खरानीको टिकालाई जोगी सदनमा गयो ।।
कुनै छन् गाईका भक्त कुनै छन् मांशभक्षक ।
अल्लारे बुद्धिकाे दम्भ ठुलो देश रक्षक ।।४

मिष्ठवाणि सधैं बोली बगाऊ संस्कृति कुलो ।
भद्रको झाँको झार्नु छ मानमर्दन हो ठूलो ।।
लुटे खाए सबै भ्याए संञ्जाल गालीले भरौं।
छिमेकीको सीमा मिच्यौँ स्वागत तालिले गरौं । ५

०००
पाल्पा