नेपाली हास्यव्यङ्ग्य अनलाइन पत्रिका

फुलौरा फुलौरा फुलौरा फुलौरा
अहा क्या मजाको छ तातो फुलौरा
जहाँ जान्छु सम्झन्छु मेरो फुलौरा
कहाँ भेट्नु नेपालको यो फुलौरा ।

यता गुद्गुदी शब्दमा भात पाकोस्
सँगै जिम्बुले मासको दाल झानोस्
टुसा टुस्किएको रसिलो बिरौंला
रिकापीभरी होस् पहेंलो फुलौरा ।

कमेरो दली शुद्ध सेतो बनेको
त्यहाँभित्र रातो हरीयो लिपेको
पिरा दारको काठको होस् बनेको
यहाँ काँसको थाल राम्रो सजेको ।

दियालो बलेको उज्यालो छरेर
उनीले दिऊन् भाग मायाँ गरेर
कचौरा भरी हाल्नु लेदो घिरौंला
चमाचम् गरी खानु मीठा फुलौरा ।

मकै होस् भुटेको फुलेको फुटेको
दुनामा कि खल्पी कि सिन्की कुटेको
खुवा होस् पुवा होस् कि खट्टे सिरौंला
सबैसाथ मिल्ने अहा क्या फुलौरा ।
फुलौरा फुलौरा……….

कमलपोखरी, काठमाडौं