नेपाली हास्यव्यङ्ग्य अनलाइन पत्रिका

२४० वर्षे पुरानो निरङ्कुश राजतन्त्र ढालियो भनेर धाक लगाउँदा
१०४ वर्षको राणाशासन घटाउने हो कि जोड्ने हो ?
०७ सालदेखि ०१७ सालसम्म त प्रजातन्त्र नै थियो
०३६ देखि ०४६ साल कसलाई कति भाग लगाउने हो ?
०४६ देखि ०६२ त सबैले गुणन गरौंला,
०६२ देखि आजसम्मको हिसाब कसरी मिलाउने हो ?

०७ सालमा राणा ढालियो, ०१७ मा ढालियो प्रजातन्त्र
०४६ मा पञ्च ढालियो, ०६३ मा ढालियो २४० वर्षे राजतन्त्र
के रह्यो त बाँकी पुरानो अब ढाल्न ?
मल्लकाल ढाल्न लाग्ने हो ?
कि लिच्छवी कालनै ढालेको धाक लगाउन थाल्ने हो ?

हामी त बहादुर जात, जे भेटिन्छ ढाल्नु पर्छ भन्ने थाहा छ
ढाल्नेले नै फेरि बनाउनु पनि पर्छ भन्ने कहाँ छ ?
तर अझै ढाल्न बाँकि छ यो २४० वर्षे देश स्वतन्त्र
केहि नपाए अब यहि ढालौं, अनि कहाँ ल्याउने कुन तन्त्र ?

जहाँसुकै ल्याउँ जुन तन्त्र, फरक के पर्छ हामीलाई ?
हामी बाहेक नेता को छ ? नमानी सुख हामीलाई ?
पार्टी हाम्रो बलियो छ, जे पनि ढाल्न सक्ने छ
गए देशकै अस्तित्व जानेन हो, हाम्रो मस्ती त रही राख्छ ।

बत्तिसपुतली, काठमाडौं