नेपाली हास्यव्यङ्ग्य अनलाइन पत्रिका

मान्छेहरू कति असंवेदनशील भएका होलान् यो कुरामा
बच्चा जन्माउने आमा पनि खोजिरहेछन् भाडामा ।

पराइसँग जोगिएकै हो बरु मलाई आफ्नै मान्छेले
पानी झिक्न लगाएर धकेलिदिएथ्यो गहिरो कुवामा ।

उसले हरदम आफ्नो जयजयकार गर्न लगाउँछ
जङ्गली सुगाहरू पालेर सुनको सुन्दर त्यो पिंजडामा ।

खुशीले हो कि आशङ्काले हो मैले यो कुरा बुझ्न सकेको छैन
मान्छेहरू बाबुको अनुहार खोज्छन् हरेक नवजात बच्चामा ।

त्यो बालापन ती साथीसँगी आज कहाँ कहाँ पुगे होलान्
टालाटुली सँगै आपसमा बिहे गरी खुब खेलिन्थ्यो सानामा ।

भनिन्छ मनभित्र नसकिने कुरा पढ्न सकिन्छ मुहारमा
अझ मुहारमा नसकिने कुरा पढ्न सकिन्छ आँखामा ।

मलाई मन्दिरमा ईश्वर छ भन्ने त लाग्दै लाग्दैन
बरु कतै छ भने मान्न तयार छु आफ्नै बा आमामा ।

यो खबर सुनेर पनि किन मौन बसेको छ सरकार
जङ्गे पिलर सारिएको छ सिमाना मिचिएको छ दश गजामा ।

कास्की, पोखरा