नेपाली हास्यव्यङ्ग्य अनलाइन पत्रिका

टन्न अघाएका तिमी भोकको चिन्ता किन हुन्थ्यो ?
हृष्टपुष्ट भएपछि रोगको चिन्ता किन हुन्थ्यो ?

दायाँ बायाँ दुनियाँ नै इशारामा चल्छ भने
नुनकै निम्ति विशेष तोकको चिन्ता किन हुन्थ्यो ?

दायाँ हातको खेल तिम्रो मार्ने ढाल्ने भएपछि
आँखैसामु बाबु ढल्दा शोकको चिन्ता किन हुन्थ्यो ?

तिम्रै चल्छ जमिन्दारी तिम्रै अख्तियारी यहाँ
तिमीलाई गौँडागल्छी चोकको चिन्ता किन हुन्थ्यो ?

भ्रमै होला पैसा भए मान्छे अमर अजर हुन्छ
त्यसैले त तिम्लाई परलोकको चिन्ता किन हुन्थ्यो ?

चौमाला–५, कैलाली