नेपाली हास्यव्यङ्ग्य अनलाइन पत्रिका

म मेरो भित्तेपात्रोमा माघ आठलाई नियाल्दै छु
आजभोलि छिमेकी आठको जताततै चर्चा सुनेर होला
माघ सात त आरिस र रिसले रातै भएको छ
कुप्रे बुढो चिप्लिएर उत्तानो टाङ लगाए झैं
टाउको तल र खुट्टा माथि लगाएको छ
छिमेकीको भाउ बढ्दा आरिस गर्नेहरूलाई जे हुन्छ
बिचरा माघ सातलाई त्यही भएको छ !

आठको अर्को छिमेकी नौलाई हेर्छु
ऊ मुन्टो बटारेर आठको उल्टो फर्केको छ
आज भोलि आठको भाउ बढेको हेर्नुभन्दा
रिसले रातै भएको दसलाई बरु हेरेको छ
म मेरो भित्तेपात्रोमा माघ आठलाई नियाल्दै छु ।

उता माघ आठ भने गचक्क परेर
आलीमा राखेको कोदाली जस्तै ढुक्क बसेको छ
आफ्नो आगमनको प्रतिक्षामा सिङ्गै देश नै उभिएको थाहा पाएर होला
ऊ त छातेटोपी लगाएर घुँडा खुम्च्याई बसेको छ
म मेरो भित्तेपात्रोमा माघ आठलाई नियाल्दै छु
म मेरो भित्तेपात्रोमा माघ आठलाई नियाल्दै छु ।

बत्तिसपुतली, काठमाडौं