नेपाली हास्यव्यङ्ग्य अनलाइन पत्रिका

१. खबरदार !

खबरदार ! केही राम्रो देख्लाऊ
राम्रो सोच्लाऊ राम्रो लेख्लाऊ
आफैं राम्रो केही गर्लाऊ
कसैलाई राम्रो भन्लाऊ
खबरदार, ढाड भाँचिने गरी भेट्लाऊ !

केही राम्रो कतै नहेर्नू
देख्खिहाले आँखा छोप्नू
सत्तो सराप सबको गर्नू
नराम्रो नै सोच्नू लेख्नू !

खत्तम खत्तम खत्तम भन्नू
जप्दै खत्तम आफैं बन्नू
हास्यव्यङ्ग्यकार मै हुँ भन्नू
खबरदार ! केही राम्रो देख्लाऊ,
ढाड भाँचिने गरी भेट्लाऊ !

२. नशा
गाँजा भाङ धतुरो जस्तै
रक्सी र प्रेम उस्तै उस्तै
कुनै लामो कुनै छोटो
मात लाग्ने छोड्ने उस्तै
नशा सबैको उस्तै उस्तै ।

मात लाग्ने सप्पै जस्तै
लाग्दा धर्ती आकाश उस्तै
आफ्नै बाउको बिर्ता जस्तै
तारा टिप्ने फूल जस्तै
रक्सी जस्तो प्रेम उस्तै
लाग्दा छोड्दा उस्तै उस्तै ।

रक्सीको मात उत्रे जस्तै
प्रेम नशा छुट्दा त्यस्तै
टाउको दुख्ने ह्याङओभरले
जिउ लल्याक लुलुक उस्तै ।

झोक्राउने पछुतो उस्तै
होस् खुल्दा दिक्क त्यस्तै
दिक्कदेखि दिक्क मान्दै
फेरि खोज्ने नशा उस्तै ।

जस्तो रक्सी प्रेम उस्तै
मात लाग्ने उस्तै उस्तै
लाग्दा मजा छोड्दा दिक्क
सबै नशाको कामै त्यस्तै ।

बत्तिसपुतली, काठमाडौं