नेपाली हास्यव्यङ्ग्य अनलाइन पत्रिका

झुटो बोल्दा बाउले मलाई भन्थे उटपट्याङ
ऐले हेर्दा म भन्दा त नेता उटपट्याङ ।

फट्याइँ पनि कति बोल्ने बोल्या जति सबै
त्यै बोलीलाई प्रचार गर्ने झोले जति सबै ।

काङ्ग्रेसको प्रजातन्त्र ठुला नेतालाई
न्याय छैन रोजगारी दुखी जनतालाई ।

कम्युनिस्ट समानता उन्कै घरमा छैन
लाटा भुँदा जन्ता हामी कुरा बुझ्ने हैन ।

नयाँ नेपाल बनाउने भन्थे नेता गण
सहमति नजुटेर पर्ने भयो रण ।

रक्तचन्दन, मूर्ति लुटे कस्तुरी र खाग
अबैध धन्दा गर्ने को हो ? नेता खान्छन् भाग ।

देश विकास, मुद्दा निकास गर्ने झुट बोले
भ्रष्टाचार र तस्करीले आफ्नो रुप खोले ।

खबर्दार जन्ता अब पार्टी नेता छोड
क्रान्तिकारी बनी, झोले प्रवृत्तिलाई तोड ।

नलाङ, धादिङ