नेपाली हास्यव्यङ्ग्य अनलाइन पत्रिका

झुटो सधै बोलेर, आसे गरिब ठगेर
टन्न अघाउ तिमी, भोकाको भाग खोसेर
आफ्नै विवेक मार्नु, दुर्बल समाई पछार्नु
तर्साई देश सारा गर्नु नगर्नु गर्नु ।

एउटा क्यै तन्त्र भन्दै, झण्डा उचाली दौड
जम्मा गरी गरिब आसे भरेर चउर
गाँजा या भाङ धतुरो, रक्सि या जाँड खाऊ
टन्नै नशामा झुम्दै सिद्धान्त क्वै सुनाऊ ।

भन्देऊ न देश भोलि स्वर्गै बनी उदाउँछ
पत्याउन्न जो कसैले डरले को सोध्न आउँछ ?
त्यसमाथि तिम्रो भिड्छ, माला गलामा तिम्रो
मन्त्र त्यहाँ सबैलाई जे झार्छ तिम्रो जिब्रो ।

आफू नशामा तिमी जे जे रमाइलो देख्छौ
भन्देऊ माइकबाट ताली हजार भेट्छौ
तिम्रो नशा अरुमा तिम्रो कुराले सर्छ
भ्रमित बनुन् सबै ती तिम्लाई फरक के पर्छ ?

तिमी फटाहा नै हौ, सच्चाईलाई दबायौ
पापी थियौ तिमी एक सबलाई त्यही बनायौ
जित्यौ ल जित देश, देवता बन्यौ तिमी ता
भविष्य जे जता होस् एकछिन भयो रमिता ।

यत्ति नबिर्से पापी, भोलि त घाम लाग्छ
भोलि नलागे पर्सि कुनै बेला त लाग्छ
झलमल्ल हुन्छ दिन जब तिम्रो नशा हराउँछ
तिमीलाई नै सराप्दै सिङ्गै यो देश कराउँछ ।

त्यसबेला तिम्रा कोही सन्तान बाँकी होलान्
धिक्कार्दै तिमीलाई छाती पिटेर रोलान्
मान्छे भएर जन्मी तिम्रो ठगी यो रुप
कस्तो नराम्रो छिछी देशकै ठूलो कलङ्क ।

एक पेट मिठो खान मोटर चडी रमाउन
ध्वस्तै बनायौ देश पैसा केही कमाउन
लाखौँ दुखेको चित्त, रोदन र तिनको चित्कार
सुन्नेछौ जन्म जन्म धिक्कार धिक्कार धिक्कार !!!

बत्तिसपुतली काठमाडौं